ЮНЕСКО-гийн 2026 оны “Торгоны зам дагуух бүтээлч байдал ба өв” сэдэвт Олон улсын залуучуудын форумд оролцох хүсэлтийг хүлээн авч эхэллээ. Энэхүү форум нь Хятадын Чанша болон Нанжин хотуудад 2026 оны 11 дүгээр сарын 15–20-ны өдрүүдэд зохион байгуулагдана.
Энэ удаагийн форумд дэлхийн өнцөг булан бүрээс залуу түүх өгүүлэгч, кино бүтээгч, соёлын өв сонирхогч, бүтээлч салбарын төлөөлөгчдийг хамруулж, соёлын өвийг орчин үеийн технологи, тэр дундаа хиймэл оюун ухааны тусламжтайгаар хэрхэн зөв, хариуцлагатайгаар сурталчлан таниулах талаар хэлэлцэх юм. Оролцогчид өөр өөр орны залуустай хамтран ажиллаж, туршлага, санаа бодлоо солилцох боломжтой.
Форумын товч мэдээлэл
- Улс: БНХАУ
- Байршил: Чанша болон Нанжин хот
- Хугацаа: 2026 оны 11 дүгээр сарын 15–20
- Хөтөлбөр: Бүрэн санхүүжилттэй
- Өргөдөл гаргах эцсийн хугацаа: 2026 оны 9 дүгээр сарын 27
- Өргөдлийн хураамж: Байхгүй
Бүрэн санхүүжилтэд юу багтах вэ?
Сонгогдсон оролцогчдын форумд оролцохтой холбоотой дараах зардлыг зохион байгуулагч тал хариуцна. Үүнд:
1. Олон улсын хоёр талын нислэгийн зардал
Оролцогчийн эх орноос Хятад руу болон буцах эдийн засгийн ангиллын нислэгийн зардлыг хариуцна.
2. Байрлах зардал
Чанша болон Нанжин хотод форумын үеэр байрлах байр, зочид буудлын зардлыг бүрэн хариуцна.
3. Хоол, хүнс
Форумын хугацаанд оролцогчдын хоолны зардлыг зохион байгуулагчид хариуцна.
4. Дотоодын тээврийн зардал
Форумын үйл ажиллагаатай холбоотой орон нутгийн тээврийн зардлыг мөн багтаасан байна.
5. Хятадын визийн хураамж
Сонгогдсон оролцогчдын Хятадын виз мэдүүлэхтэй холбоотой хураамжийг хариуцна.
6. Аяллын даатгал
Форумд оролцох хугацаанд шаардлагатай аяллын даатгалд хамруулна.
Форумын тухай
“Торгоны зам дагуух бүтээлч байдал ба өв” сэдэвт Олон улсын залуучуудын форум нь ЮНЕСКО болон түүний түнш байгууллагуудын санаачилгаар 2017 оноос эхлэн зохион байгуулагдаж ирсэн олон улсын арга хэмжээ юм.
Тус форум нь дэлхийн өөр өөр орны залуусыг нэг дор цуглуулж, соёлын өвийн талаар шинэ санаа солилцох, харилцан туршлага хуваалцах, улс орнуудын хоорондын соёлын ойлголцол, хамтын ажиллагааг нэмэгдүүлэх зорилготой. Өмнөх форумуудад нийт 146 орны 800 гаруй залуу оролцож байсан байна.
2026 оны форумын гол сэдэв нь хиймэл оюун ухааны эрин үе дэх залуучуудын оролцоотой бүтээлч соёлын өвийн илэрхийлэл юм. Өөрөөр хэлбэл, залуус хиймэл оюун ухаан болон орчин үеийн бүтээлч технологийг ашиглан өөрсдийн орны соёлын өв, уламжлал, түүхийг шинэ хэлбэрээр хэрхэн дэлхийд таниулах талаар суралцаж, туршлага солилцоно.
Хэн оролцох боломжтой вэ?
Форумд оролцох хүсэлтэй хүмүүс дараах шаардлагыг хангасан байна.
- 18–32 насны байх;
- ЮНЕСКО-гийн “Youth Lens” буюу залуучуудын өнцгийг ойлгож, суралцан хэрэгжүүлэх хүсэлтэй байх;
- Хиймэл оюун ухааныг ашиглан өөрийн орны соёлын өвийн үнэ цэнэ, онцлог, бүтээлч байдлыг харуулах чадвартай байх;
- Олон улсын, олон соёлт багийн хүрээнд үр дүнтэй хамтран ажиллах чадвартай байх;
- Түүх өгүүлэх, кино бүтээх, соёлын өв, бүтээлч салбарын аль нэгийг сонирхдог эсвэл энэ чиглэлээр туршлагатай байх.
Хэрхэн бүртгүүлэх вэ?
Форумд оролцохыг хүссэн залуус албан ёсны өргөдлийн цахим хуудсаар дамжуулан материалаа илгээх шаардлагатай. Өргөдөл гаргахдаа дээр дурдсан шалгуурыг хангаж байгаа эсэхээ анхаарах хэрэгтэй.
Соёлын өвийг шинэ технологитой хослуулан дэлхийд таниулах, өөр орны залуустай хамтран ажиллах сонирхолтой залуусын хувьд энэхүү форум нь олон улсын туршлага хуримтлуулах, шинэ мэдлэг эзэмших, өөрийн бүтээлч санаагаа хөгжүүлэх боломж болох юм.
3276
