Дөрөвдүгээр сард цацагдах ШИЛДЭГ 7 К-Драма

К-Драма буюу Өмнөд Солонгосын кино урлаг жил бүр сайжирч, хөгжин дэвшсээр байна. Өмнөх сард л гэхэд “When Life Gives You Tangerines” цуврал цацагдаж, эхний анги гарсан даруйдаа л олон улсад алдаршиж эхэлсэн. Одоо ч Netflix-ийн шилдэг телевизийн цуврал хэсэгт багтсаар байна.

Харин дөрөвдүгээр сард эмч нарын нөхөрлөл, таван царайлаг залууг өөртөө дурлуулж буй өөртөө итгэлгүй охин, 30 ба 80 настны хайр дурлал, муу ёрын сүнсэнд эзэмдүүлсэн нэгэн, амь амьдралаа золиослоод даалгавар биелүүлэхээр явж буй залуус гээд олон сонирхолтой зохиолтой цувралууд нээлтээ хийх гэж байна. Энэ удаад аль цуврал хамгийн амжилттай байх бол?

Ингээд дөрөвдүгээр сард цацагдах шилдэг 7 к-драматай танилцана уу.

“WAY BACK LOVE”

Цацагдах өдөр: Дөрөвдүгээр сарын 3

Нийт анги: 6 - /нэг анги нь 45 минут үргэлжилнэ/

Өмнөд Солонгосын хаа нэгтээ Жун Хүй Ван гэгч 24 настай эмэгтэй амьдрах хүсэл эрмэлзэлгүй, ганцаардмал амьдралаар өдрийг өнгөрөөнө. Гэтэл нэгэн өдөр дөрвөн жилийн өмнө нас барсан анхны хайр Ким Рам У хаалгыг нь тогшино. Ким Рам У түүнийг амьд байх ердөө 7 хоног үлдсэн гэдгийг сануулахаар ирсэн нь энэ байв. Харин амар тайван нойрсохыг хүсвэл Ким Рам У гэх нэрийг гурван удаа дуудахад л хангалттай гэнэ. Үүнийг сонссон Жун Хүй Ван амьд үлдэхийн төлөө бус амьдарч буй цаг хугацаагаа үнэ цэнтэй, дурсамжтай байлгахаар шийдэж холын аялалд гардаг.

“KARMA”

Цацагдах өдөр: Дөрөвдүгээр сарын 4

Нийт анги: 6 - /нэг анги нь 60 минут үргэлжилнэ/

Буцааж боломгүй тохиролцоонд орсон гэрч, насан туршийн шархтай эмч, өрийн дарамтад орсон эр, өндөр цалинтай ч амьдралаа золиослох аюултай ажил хүлээн авсан ажилгүй залуу, Ганнамд хувийн эмнэлэг ажлуулдаг амжилттай эмч болон түүний найз бүсгүй. Тус цуврал нь эдгээр зургаан хүний амьдралыг өгүүлнэ. Тэд ямар нэгэн байдлаар аймшигтай харилцаанд хутгалдаж, хүссэн ч зугтаж чадахааргүй хэцүү байдалд орно.

“CRUSHOLOGY 101”

Цацагдах өдөр: Дөрөвдүгээр сарын 4

Нийт анги: 12 - /нэг анги нь 1 цаг 10 минут үргэлжилнэ/

Бенни бол Ёин их сургуулийн шилдэг барималч охин. Тэрээр гадаад төрхөөс илүү хүний дотоод мөн чанар, сэтгэл чухал гэж үздэг нэгэн. Гэтэл Бенни анхны хайрдаа хаягдаж, өөртөө итгэлгүй болно. Энэ үед их сургуулийн царайлаг таван залуу түүнийг сонирхож эхэлснээр Беннигийн бодол өөрчлөгддөг.

“RESIDENT PLAYBOOK”

Цацагдах өдөр: Дөрөвдүгээр сарын 12

Нийт анги: 12

Алдартай бус нэгэн жижигхэн эх барих эмэгтэйчүүдийн тасагт ажиллаж буй залуухан эмч нар болон тэдний нөхөрлөл, адармаат эмнэлгийн амьдралыг харуулна. Энэхүү цувралаар Өмнөд Солонгосын хүн амын төрөлт буурч байгаа үеийн бодит түүхийг өгүүлэх аж.

“THE HAUNTED PALACE”

Цацагдах өдөр: Дөрөвдүгээр сарын 18

Нийт анги: 16 - /нэг анги нь 1 цаг 10 минут үргэлжилнэ/

Сайхан сэтгэлтэй, ухаалаг язгууртан залуу муу ёрын Имүги сүнсэнд эзэмдүүлснээр онцгой хүч чадалтай хүн болон хувирна. Харин нөгөө талд бөө болох хувь тавилангаасаа татгалзаж, оронд нь гар урлалын чадварлаг дархан болохоор шийдсэн залуу авхай нарын адармаат амьдралын түүхийг өгүүлнэ.

“HEAVENLY EVER AFTER”

Цацагдах өдөр: Дөрөвдүгээр сарын 19

Нийт анги: 12 - /нэг анги нь 60 минут үргэлжилнэ/

Эл кино нь Хэ Сүг хэмээх өндөр настай эмэгтэйн түүхийг өгүүлнэ. Тэрээр нөхөртэйгөө хамтдаа аз жаргалтай хамт амьдарч байгаад хорвоог орхиж, диваажинд ирнэ. Диваажинд байх хүмүүс хэдэн настай байхыгаа сонгож орно. Гэтэл Хэ Сүг эмээ, нөхөр нь түүнийг 80 настай байхдаа хамгийн үзэсгэлэнтэй харагддаг гэж хэлснээс болж 80 настай байх сонголт хийнэ. Энэ үед түүний нөхөр 30 настай байх сонголт хийснээр тэдний дунд олон үл ойлголцол үүснэ.  

“PUMP UP THE HEALTHY LOVE”

Цацагдах өдөр: Дөрөвдүгээр сарын 30

Нийт анги: 12 - /нэг анги нь 1 цаг 10 минут үргэлжилнэ/

Ду Хён Жүн бол 24 цагийн фитнес клубийн дасгалжуулагч залуу. Тэрээр амьдралынхаа туршид эрүүл зөв хооллож, дасгал хөдөлгөөн хийсэн шаргуу нэгэн. Харин Ли Ми Ран бол  аялал жуулчлалын агентлагийн төлөвлөлт, хөгжлийг хариуцсан менежер. Ми Ран хоолонд үнэхээр дуртай ба эрүүл амьдралын хэв маягийг чухалчилж хардаггүй эмэгтэй. Гэтэл санамсаргүй байдлаар Ли Ми Ран дасгалжуулагч залуугийн шавь болсноор эрүүл амьдралын хэв маягт дасах гэж чадлаараа хичээж буйг өгүүлэх юм.

Эх сурвалж: MyDramaList, GQ