Видео контент /reel/ бүтээх уралдаан зарлалаа

Их, дээд сургуулийн оюутан залуусын дунд видео контент /reel/ бүтээх уралдаан зарлажээ.

Монголын татварын алба 2025 оны “Татвар төлөгчдийн өдрүүд”-ийг угтан ирээдүйн  татвар төлөгч оюутан залуусын татварын тухай мэдлэг, боловсролыг дээшлүүлэх зорилгоор 2025 оны 03 дугаар  сарын 26-ны өдрөөс 04 дүгээр сарын 25-ны өдрийг дуустал зарласан байна.

Уралдаанд оролцогч нь “Татварын ач тус” сэдвийн хүрээнд татвар  төлөх нь Улс эх орны хөгжилд ямар ач холбогдолтой талаар утга санааг илэрхийлсэн байна. 

Уралдаанд ирүүлэх бүтээл нь бичлэг дуу, дүрс тод, оюуны өмчид халдаагүй, ёс бус үг хэллэг ашиглаагүй, эерэг хандлагатай байх ба нийт хугацаа 90 секундээс хэтрээгүй байна.

Ирүүлсэн бүтээлийг шалгаруулахдаа уралдааны сэдвийн хүрээнд агуулгыг олон нийтэд энгийн ойлгомжтой, товч тодорхой илэрхийлсэн зэрэг ур чадварыг харгалзан, татварын албадаас томилогдсон уралдаан дүгнэх комисс шалгаруулан байр эзлүүлнэ.

Уралдаанд оролцогч нь бүтээлийн нэр, аймаг, нийслэл, сум, дүүрэг хороо, сургууль анги, овог, нэр, холбоо барих утасны дугаар, контентын хамт 2025 оны 04 дүгээр сарын 25-ны өдрийн 23 цаг 59 минутаас өмнө өөрийн харьяа татварын албанд цахимаар  ирүүлнэ. Бүтээлийг байршуулахдаа оролцогчийн мэдээллийг нууцалсан байна.

Аймаг, нийслэл, дүүргийн уралдаан дүгнэх комисс ирүүлсэн бүтээлүүдээс 04 дүгээр сарын 27-ны өдрийн дотор шалгарсан 1 бүтээлийг ТЕГ-ын Олон нийттэй харилцах төвд  ирүүлнэ. Шалгарсан бүтээлийг Монголын татварын албаны пэйж хуудсанд 2025 оны 04 дугаар сарын 28-ны өдрөөс 05 дугаар сарын 02-ны  өдрийг дуустал байршуулж олон нийтэд танилцуулна. 

ТЕГ-аас томилогдсон уралдаан зохион байгуулах комисс татварын албадаас ирсэн бүтээлүүдээс шилдэг 3 бүтээл, болон олон нийтийн хамгийн их хандалт авсан 1 бүтээлийг шалгаруулж урамшуулна.  Уралдааны шагналыг  Татвар төлөгчдийн өдрүүдийг тэмдэглэн өнгөрүүлэх арга хэмжээний хүрээнд олгоно. 

Бүтээлийг татварын албаны цахим хуудас болон албаны сошиал хаягуудаар алдаршуулна. Уралдаанд оролцсон бүтээлийг  Татварын албаны нийгмийн сүлжээний хаягуудад байршуулж, сурталчилгааны зориулалтаар ашиглана.