Зөвхөн Шинжлэх ухааны уран зөгнөлт киноноос хардаг таамгууд биеллээ олж, ирээдүйд гэдэг байсан технологиуд өнөөдөр хэрэглэгдэж эхэлсний нэг жишээ нь метаверс билээ.
"Meta" тэргүүтэй дэлхийд тэргүүлэгч компаниуд төдийгүй Монголын технологийн байгууллагуудын яриад, хэрэглээд эхэлсэн метаверс хэмээх технологийн талаарх мэдээллийг хүргэе.
Метаверс гэж юу вэ?
Метаверс гэдэг нь 3D виртуал ертөнцөд суурилсан нийгмийн харилцааны сүлжээ юм. 3D виртуал ертөнц гэж компьютероор бүтээсэн дуураймал орчныг тодорхойлдог.
Метаверсэд хандах аргыг AR болон VR төхөөрөмжийн тусламжтайгаар хөнгөвчилсөн.
AR гэдэг нь Augmented reality буюу бодит ертөнцийн үзэгдэл, орчин дээр компьютерын аргаар хийсвэр үзэгдэл, мэдээллийг нэмж харагдуулсан технологи.
VR гэдэг нь Virtual reality буюу бодит ертөнцөөс маш өөр хийсвэр, дуураймал орчныг харагдуулдаг технологи юм.
Метаверс хэмээх нэршлийг анх 1992 онд хэвлэгдсэн шинжлэх ухааны уран зөгнөлт “Snow Crash” зохиолд хэрэглэсэн.
Гэхдээ тус зохиолд “meta” буюу “өргөн хүрээтэй, илүү давсан” хэмээх утгатай үгийг “universe” буюу ертөнц гэх үгтэй хольж шинэ үгээр ашигласан байна.
Өдгөө Second Life, Decentraland зэрэг тоглоом, нийгмийн харилцаанд зориулсан виртуал ертөнцүүдийг илүү өргөжүүлэн метаверс хэмээн хөгжүүлсээр байна.
Метаверс нь анхандаа виртуал ертөнцийн сүлжээгээ олонд хүргэх, сурталчлах зорилгоор ашигладаг хэтрүүлэгтэй үг байсан бол өдгөө бодит хэрэглээ болжээ.
Second Life-ийг анхны метаверс хэмээн хүлээн зөвшөөрдөг бөгөөд тус платформыг ашиглагчид өөрсдийн avatar-ыг бүтээж интернэтийн сүлжээнд бусадтай харилцдаг. Аватар гэдэг нь хиймэл орчинд өөрийгөө төлөөлүүлэх дүр юм.
Харин Minecraft, Roblox тоглоомуудыг метаверс хэмээн нэрлэх болсноос хойш Active Worlds, The Palace, Decentraland, Fortnite тоглоомууд метаверс болж байгаагаа мэдэгдсэн юм.
Мөн Facebook-ийн толгой компани Meta “Horizon Worlds” хэмээх метаверс бүтээхээр болсноо мэдэгдсэн. Компанийн гүйцэтгэх захирал Марк Зукербергийн хэлснээр метаверс бүтээхэд 10 мянган ажлын байр бий болгож 10 жилийн дотор 10 тэрбум төгрөг зарцуулах юм. Meta компани 2014 оноос Oculus хэмээх VR төхөөрөмжийг хөгжүүлэн борлуулж байгаа билээ.
Монголын "Mongol NFT" компани блокчейнд суурилсан "The Sandbox" метаверсэд өөрсдийн газартай болж, түүндээ Мета UB хотыг бүтээх уралдаан зарласан.
Энэ бол метаверсэд хандах хүмүүсийн тоо маш хурдан нэмэгдэж, дэлхийн өнцөг булан бүрт тархсаны жишээ юм. Учир нь метаверсэд найзуудтайгаа хамт тоглох, худалдан авах, бусадтай харилцах, бараагаа борлуулах гээд олон төрлийн хэрэгцээгээ хангаж байгаа нь хэрэглэгчдийг татаж байна.
"Unity" компанийн гүйцэтгэх захирал Жон Риччитиелло "10 жилийн дараа хүн бүр нүдний шил зүүдэг болно. Зүгээр ч нэг шил биш таныг метаверстэй холбох төхөөрөмж нь байх юм" гэсэн удаатай.
Microsoft, Samsung компаниуд хөрөнгө оруулаад эхэлсэн энэ салбар дэлхий даяар гар утас тархсан шиг хүн бүрийн хэрэглээ болохыг мэргэжилтнүүд хэлсээр байна.
Хэрэв метаверсийн тухай илүү ойлголттой болохыг хүсвэл 2011 онд хэвлэгдсэн ижил нэрт зохиолоос сэдэвлэсэн "Ready Player One" киног үзэхийг санал болгож байна.
Та энэ хүслийг өөр дээрээ нэмсэн байна!
Та энэ хүслийг биелүүлсэн байна!
Та хүслээ амжилттай биелүүллээ!
9
1008
2022-07-05