Элсэлтийн шалгалтын бүртгэл ирэх сарын 20-ны өдөр хүртэл үргэлжилнэ

2025 оны элсэлтийн шалгалт зургаадугаар сарын 18-21-ний өдрүүдэд зохион байгуулагдана. Элсэлтийн шалгалтын бүртгэл хоёрдугаар сарын 17-нд эхэлсэн ба дөрөвдүгээр сарын 20-ны 18:00 цаг хүртэл үргэлжилнэ.

Монгол хэл бичгийн шалгалтын бүртгэл дууссан ба шалгалтыг дөрөвдүгээр сарын 17, 18-ний өдрүүдэд зохион байгуулна.

2025 ОНЫ ЭЛСЭЛТИЙН ШАЛГАЛТЫН ХУВААРЬ

Зургаадугаар сарын 18 /Лхагва гараг/

• Түүх - 10:00-11:20
• Англи хэл - 14:00-15:20

Зургаадугаар сарын 19 /Пүрэв гараг/

• Хими – 10:00-11:40
• Газарзүй – 13:00-14:20
• Нийгэм судлал – 16:30- 17:50

Зургаадугаар сарын 20 /Баасан гараг/

• Биологи – 10:00-11:20
• Математик – 14:00-15:20

Зургаадугаар сарын 21 /Бямба гараг/

• Физик – 10:00-11:40
• Орос хэл – 13:00- 14:20
• Монгол хэл – 16:00-17:20

Элсэлтийн шалгалтыг улс орон даяар 52 шалгалтын байранд зохион байгуулах  ба орон нутагт 23, нийслэлд 29 шалгалтын төв байна.

Шалгуулагч нь /eyesh.eec.mn/ цахим хаяг руу хандан бүртгэлээ хийх ба бүртгүүлэхдээ дараах материалыг бэлтгэсэн байна. Шалгуулагч зөвхөн өөрийн и-мэйл хаягаар бүртгүүлэх юм.

Үүнд:

• Иргэний үнэмлэх болон түүнтэй адилтгах баримт бичиг /иргэний үнэмлэхийн лавлагаа, гадаад паспорт мөн гадаадын иргэний Монгол Улсад оршин суух түр үнэмлэх /
• Өнгөт цээж зураг /цээж зураг нь 3*4 хэмжээтэй, сүүлийн 3 сарын дотор авхуулсан, урагш цэх харсан, арын фон нь цайвар цулгуй өнгийн, нарны шил болон малгайгүй байна/
• Бүх банкны интернэт гүйлгээ хийх эрхтэй төлбөрийн карт

Тусгай хэрэгцээ шаардлагатай  болон тусгай сургуулийн суралцагч элсэлтийн шалгалтад орохоор бүртгүүлсэн бол Боловсролын үнэлгээ төвд эмчийн магадалгаа, сургуулийн тодорхойлолт, өргөдлийг бүртгэлийн хугацаанд гаргах эрхтэй.

МХБШ-ын суудлын хуваарийг 2025 оны 04 дүгээр сарын 01-ний өдөр зарлана.