Европт суралцах хүсэлтэй оюутнуудын хувьд Итали улсад чанартай боловсрол эзэмшихийн зэрэгцээ мужийн тэтгэлгүүдэд хамрагдан сургалтын төлбөр, амьдрах зардлаа хөнгөвчлөх боломжтой орнуудын нэг юм. Гэхдээ сургууль болон тэтгэлэгтээ өргөдөл гаргах явцад шаардлагатай бичиг баримт, хугацаа, шалгуур зэрэг олон зүйл тодорхойгүй санагдах нь бий. Энэ үед өмнө нь уг үйл явцыг туулсан оюутны бодит туршлага, зөвлөгөө ихээхэн тус болдог.
Тиймээс энэ удаа Итали улсын Турин их сургуульд “Олон улсын хууль, шилжилт хөдөлгөөний төлөвлөгөө” мэргэжлээр тухайн мужийнхаа 100 хувийн тэтгэлэгээр суралцдаг Т.Эрхэмбилэгтэй ярилцлаа. Тэрээр Итали болон Турин их сургуулийг сонгосон шалтгаан, сургалтын систем, Пьемонт мужийн EDISU тэтгэлэгт хамрагдсан туршлага, өргөдөл гаргахдаа анхаарах зүйлсээс гадна Италид суралцаж буй оюутны хувьд хуримтлуулсан туршлагаасаа хуваалцлаа.
-Юуны өмнө өөрийгөө танилцуулаад, яагаад Итали тэр дундаа Турин их сургуульд сурахаар шийдсэн тухайгаа хуваалцаач?
-Намайг Эрхэмбилэг гэдэг. Би Италид гурав дахь жилдээ буюу төгсөх курсдээ Олон улсын хууль, шилжилт хөдөлгөөний төлөвлөгөө чиглэлээр суралцдаг.
Анх Азийн орнуудын их сургуулиудыг түлхүү сонирхож, University of Tokyo, APU, Ewha Womans University зэрэг сургуулиудад өргөдөл гаргаж ерөхнийдөө бүгдэнгээс нь тэтгэлэг болон сургалтын төлбөрийн хөнгөлөлт авч байсан. Гэхдээ Азийн орнуудын нийгмийн орчин, амьдралын хэв маяг илүү хөл хөдөлгөөн ихтэй, бужигнасан санагдаад Европт суралцах боломжуудыг судалж эхэлж байсан.
Тэр үед Италид суралцдаг монгол оюутны влог YouTube бичлэг олж үзээд анх Турин их сургуулийн кампустай танилцаж байлаа. Итали, Европ гэхээр хуучны, эртний өнгө аястай гэж төсөөлдөг байсан ч тус сургуулийн шилэн, орчин үеийн архитектур их таалагдсан. Тиймээс тус сургууль руу өргөдлөө явуулахаар шийдээд, Итали руу өргөдлөө явуулсан ганцхан сургууль нь Turin их сургууль байсан.
-Сургалтын систем, багш нарын хичээл заах арга барил, сургуулийн орчин ямар вэ?
-Сургуулийн орчин их таалагддаг. Сургуулийн эргэн тойронд оюутнуудын цугларах олон газар, хоолны газар, кофе шоп, номын сан, парк байдаг. Манай их сургуулийн профессор хүртэл гадаа зүлгэн дээр сууж ярилцах, хичээлээ хийхийг санал болгож уриалдаг. Хүмүүс нь илүү чөлөөтэй, нээлттэй харилцдаг нь гоё санагддаг.
Сургалтын системийн хувьд Европын орнуудад ерөнхийдөө 13 жилийн боловсрол эзэмшээд, дараа нь 3 жилийн бакалаврын хөтөлбөрт суралцдаг. Магистрыг 2 жилээр үргэлжлүүлэх эсвэл зарим мэргэжлээр бакалавр, магистрыг хосолсон 5 жилийн хөтөлбөрөөр сурах боломжтой.
Монголын их сургуулиудтай харьцуулахад нэг ялгаа нь үнэлгээний систем. Монголд ирц, шалгалт зэрэг олон хэсгээс дүн бүрддэг бол Италид ихэнх хичээлд ирц авдаггүй. Голчлон улирлын төгсгөлийн шалгалтаар дүнгээ гаргадаг бөгөөд тэр нь 30 оноогоор үнэлэгддэг. Үүнээс доод талдаа 18 оноо авж байж ер нь тухайн хичээлийг үзсэн кредитээ цуглуулах боломжтой.
-Шалгалтын систем ямар байдаг вэ? Ялангуяа аман шалгалтад дасан зохицоход хэр байсан бэ?
-Италид очоод анх шалгалтын системийг сайн мэдэхгүй байсан учраас аман шалгалт өгөхөд бага зэрэг сандарч байсан. Гэхдээ хичээлээ урьдчилан үзэж, сайн бэлдсэн байхад аман шалгалт тийм хүндрэлтэй биш.
Шалгалтын хэлбэр мэргэжлээсээ хамаардаг. Жишээлбэл, инженерийн чиглэлийн оюутнууд компьютер дээр тооцоолол хийх шалгалт өгөх нь элбэг. Харин хууль болон нийгмийн шинжлэх ухааны чиглэлийн мэргэжлүүдэд аман болон бичгийн шалгалт ихэвчлэн авдаг.
Зарим сонголтын хичээл дээр судалгааны ажил хийж, түүнийгээ ппт хэлбэрээр хамгаалан дүнгээ авах боломжтой. Шалгалтын үнэлгээ мөн 30 оноогоор тооцогддог.
-Хичээлээс гадуур чөлөөт цагаа хэрхэн өнгөрөөдөг вэ?
-Монголд байхдаа нэлээд дотогшоо, дотны хүмүүстэйгээ л чөлөөтэй харилцдаг байсан. 10 жилдээ ч дотогшоо хүүхэд байсан. Харин Италид очоод илүү нээлттэй болж, шинэ хүмүүстэй танилцах, өөрийгөө шинэ хүмүүсээр хүрээлүүлэх дуртай болсон.
Мөн найзууд болон шинэ хүмүүстэй танилцаж тэдний сонирхдог зүйлсийг туршиж үзэх сонирхолтой. Жишээ нь нэг найз маань гар урлалаар сонин зүйлс хийдэг, өөр нэг найзынхаа хумс хийх хоббитой. Бусдын дуртай, сонирхолтой зүйлсийг туршиж үзэх сонирхолтой санагддаг.
СУРГУУЛЬДАА ӨРГӨДӨЛ ГАРГАХ ПРОЦЕСС
-Европ болон Италийн их сургуулиудад өргөдөл гаргах процесс хэзээ эхэлж, ямар дараалалтай явагддаг вэ?
-Хувийн болон улсын сургуулиудын өргөдлийн процесс ялгаатай байдаг. Улсын сургуулиудын хувьд бакалаврын өргөдөл ихэвчлэн 1-р сарын сарын сүүлээс 2-р сарын эхээр нээгдэж, 4-р сарын сүүлээс 5-р сарын дунд хүртэл үргэлжилдэг.
Мэргэжлээсээ хамаараад элсэлтийн шалгалтын оноогоо мөн явуулна. Сургуулийн хариу ихэвчлэн 7-р сард гардаг бөгөөд үүний дараа тэтгэлгийн материал бүрдүүлэх процесс эхэлнэ.
Тэрнээс өмнө сургуульдаа бас суралцах гэдгээ бататгаад давхар өөр портал нэг вебсайт дээр бүртгэлээ үүсгэдэг. Үүний дараа визний процесс үргэлжилдэг.
-Өргөдөл бэлдэж байхдаа хамгийн их анхаарах ёстой зүйл юу вэ?
-Хамгийн түрүүнд материал өгөх эцсийн хугацааг маш сайн анхаарах хэрэгтэй. Италийн их сургуулиудын мэдээлэл заримдаа нэлээд замбараагүй, бүр зарим нь зөвхөн итали хэл дээр байдаг. Тиймээс тэр дундаас мэдээллийг өөрөө өөрөө мэдээллээ маш сайн ухаж судалж шүүлтүүртэй харах хэрэгтэй. Би бас тэр тал дээр анх алдаж байсан.
Мөн элсэлтийн хугацааг зөв ялгах нь чухал. Италийн их сургуулиудын зарим нь Европын холбооны оюутан болон Европын холбооны бус олон улсын оюутан гэсэн хоёр тусдаа элсэлттэй байдаг. Хэрвээ та Европын холбооны нэг оронд байх юм бол Италийн их сургуулиуд руу хавар элсэж орох боломжтой. Хэрвээ гадаад оюутан бол зөвхөн амар л элсэж орно. Тэрийг маш сайн анхаарах хэрэгтэй.
Үүнээс гадна тухайн сургуулийн элсэлтийн шалгалтыг урьдчилан судалж, mock test-үүд дээр ажиллан, шалгалтаа эрт захиалах хэрэгтэй. Шалгалтын суудал дуусаад явуулж чадахгүй тохиолдол гардаг.
-Италийн их сургуулиудын элсэлтийн шалгалт хэр хэцүү вэ?
-2025 он хүртэл TOLC-E, TOLC-I, TOLC-F шалгалтуудыг өгдөг байсан. Харин одоо CEnT шалгалтын систем болж өөрчлөгдсөн. Өмнөх TOLC нь тухайн хүүхдийн сурах гэж байгаа хөтөлбөрийн чиглэлд илүү төвлөрсөн байсан бол CEnT нь илүү өргөн хүрээтэй буюу итали хэлний нэг хэсэгтэй, англи нэг хэсэгтэй бас байдаг болчихсон. Гэхдээ зөвхөн англи дээр хийснээ явуулчихаж болно. Бэлдэх материалууд бас байгаа. Тийм учраас бэлдэхэд урьдчилаад нэг сарын өмнөөс авахуулаад бэлдээд эхлэхэд гайгүй.
МУЖИЙН ТЭТГЭЛЭГ
-Тухайн мужийн EDISU-ийн тэтгэлэгт өргөдөл гаргахад Монгол оюутнууд юунд анхаарах хэрэгтэй вэ? Ялангуяа гэр бүлийн орлого, бичиг баримтыг баталгаажуулах тал дээр ямар процесс байдаг бол?
-Мужийн тэтгэлэг нь тухайн оюутны ар гэрийн санхүүгийн нөхцөлд үндэслэдэг. Тухайн хүүхдийн гэр бүлд хамт амьдарч байгаа 18-аас дээш насны бүх хүмүүсийн жилийн орлого, санхүүгийн мэдээллийг хардаг бөгөөд зарим тохиолдолд хоёр жилийн санхүүгийн тодорхойлолт шаарддаг.
Үүнийг уншиж байгаа хүүхдүүдэд хэлэхэд өөрийн өргөдөл гаргаж буй сургууль болон хотоосоо хамаараад мужийн тэтгэлэг нь өөр өөр байдаг. Муж бүр өөрийн гэсэн нэр, шалгууртай тул суралцах гэж байгаа газар бүрийн тэтгэлгийг тусад нь судлах хэрэгтэй.
Энэ ярилцлагын хүрээнд EDISU-ийн талаар ярьж байгаа учраас миний тайлбарлаж байгаа материалууд нь зөвхөн EDISU-ийн тэтгэлэгт материал бүрдүүлэхэд хамааралтай юм.
Монгол оюутнуудын хувьд анхаарах нэг чухал зүйл нь тэтгэлгийн материал явуулах хугацаа болон визэнд орох хугацаа давхцах тохиолдол байдаг. Тэр үед хүмүүсийн дунд “Визэнд орохдоо баян харагдах ёстой, тэтгэлэгт болохоор ядуу харагдах ёстой” гэсэн meme хүртэл байдаг шүү дээ. Ер нь энэ хоёр материал дээр санхүүгийн мэдээллийн зөрүүг их анхаардаг.
Тиймээс тэтгэлгийн материал болон визний материалаа маш сайн анхаарч, хооронд нь зөрүү гаргахгүйгээр зөв бэлдэх нь чухал. Тэтгэлгийн материалаа визний материалтай андуурах, эсвэл тэтгэлэгт явуулсан материалаа визэнд өгөх зэрэг алдаа гарсан тохиолдол саяхан хэд хэдэн удаа гарсан байсан.
ӨДӨР ТУТМЫН ЗАРДЛАА ЗӨВ ЗОХИЦУУЛЖ ЧАДВАЛ EDISU-ИЙН ТЭТГЭЛГЭЭР ИТАЛИД ХАРЬЦАНГУЙ БОЛОМЖИЙН АМЬДРАХ БОЛОМЖТОЙ
-Тухайн мужийн буюу EDISU-ийн тэтгэлэгт хамрагдсанаар ямар дэмжлэг авдаг вэ? Италид амьдрахад хэр хүрэлцээтэй байдаг вэ?
-EDISU-ийн тэтгэлэгт хамрагдсанаар хамгийн түрүүнд сургалтын төлбөрөөс хөнгөлөлт эдлэх боломжтой. Сургалтын төлбөрөө төлөөд суралцсан тохиолдолд жилийн төлбөр нь ерөнхийдөө 2,500 евро хүртэл байдаг нь Монголын их сургуулийн төлбөртэй харьцуулахад харьцангуй ойролцоо. Харин тэтгэлэгт хамрагдаагүй, эсвэл тэтгэлгээ алдсан, хоцорсон тохиолдолд ч санхүүгийн холбогдох бичиг баримтаа бүрдүүлэн бүртгүүлж, сургалтын төлбөрөөсөө хөнгөлүүлэх боломжтой. EDISU-ийн тэтгэлэгт хамрагдсан тохиолдолд сургалтын төлбөрийг бүрэн тэглүүлэх боломжтой.
Үүний дараа дотуур байранд орох боломжтой. Дотуур байранд орсон тохиолдолд гар дээр авах тэтгэлгийн стипенд мөнгө жилийн 5,200-5,300 евро орчим бөгөөд үүнийг хоёр хувааж олгодог. Энэ нь сард ойролцоогоор 400 еврогийн мөнгө гар дээр авах боломжтой гэсэн үг. Энэ нь харьцангуй боломжийн, их мөнгө. Учир нь дотуур байр, цахилгаан, тээврийн зэрэг зардлууд байхгүй учраас гар дээр ирж буй мөнгөө голчлон хоол хүнс болон өдөр тутмын хэрэгцээндээ зарцуулах боломжтой.
Мөн дотуур байранд амьдардаг оюутнууд фитнесийн үйлчилгээг жилийн 12 орчим еврогоор ашиглах боломжтой. Өөрөөр хэлбэл сарын нэг евро орчим буюу 4,000 орчим төгрөгөөр фитнест явах боломжтой гэсэн үг.
Үүнээс гадна сургуулийн ойролцоо оюутны цайны газар байдаг. Нэг хоолыг 2.5 орчим еврогоор буюу 10,000 орчим төгрөгөөр авах боломжтой. Өглөө, өдөр, оройн хоолоо тус тусад нь авч идэх боломж бий.
Мөн тус хот, мужийн зүгээс 26-аас доош насны иргэд, ялангуяа оюутнуудад зориулан хэрэгжүүлж буй бодлогын хүрээнд нийтийн тээврээр зорчих тасалбар үнэгүй болсон. 2024 онд намайг анх очиход жилийн төлбөр нь 256 евро орчим байсан. Үүнээс гадна хотын болон мужийн музейнүүдэд оюутнуудад хөнгөлөлттэй үнээр үйлчлэх бөгөөд ресторан зэрэг олон газарт оюутны үнэмлэхээ үзүүлснээр хөнгөлөлт эдлэх боломжтой.
Хэрэв дотуур байранд орохгүй бол жилийн тэтгэлгийн хэмжээ ойролцоогоор 8,000 евро байдаг нь энэ жилээс нэмэгдэж байгаа. Манай хотын хувьд байрны үнийг дагаад тэтгэлгийн хэмжээг нэмэгдүүлж эхэлж байгаа. Дотуур байранд орохгүй гэдэг нь гадуур байр түрээслэх шаардлагатай гэсэн үг учраас жилийн 8,100 орчим еврогийн тэтгэлгээр байр, хоол хүнс болон өдөр тутмын бусад бүх зардлаа өөрөө зохицуулна.
Байрны түрээсийн үнэ харилцан адилгүй. Хамгийн хямддаа 250 еврогоор байр түрээслэх боломжтой тохиолдол байдаг бол үүнээс дээш үнэ хязгааргүй. Тиймээс тухайн хүн ямар үнээр байр түрээслэхээс хамаарч гар дээр үлдэх мөнгө нь өөр байна. Харин өдөр тутмын хэрэглээний зардлыг зөв зохицуулж чадвал сард 300 гаруй евро орчим хэрэгцээний мөнгө хангалттай хүрэх боломжтой.
Би анх 2024 онд Италид очихдоо сард 100 орчим еврогоор хүнсний зардлаа зохицуулдаг байсан. Долоо хоног бүр хүнсээ урьдчилан бэлдээд байвал харьцангуй боломжийн байдаг.
-Тэтгэлгээ дараагийн жилүүдэд хадгалахын тулд юуг анхаарах шаардлагатай вэ?
-Мэргэжил бүрээс шалтгаалан шаардлага нь өөр байж болох ч ерөнхийдөө манай мэргэжлийн хувьд бакалаврын хөтөлбөр гурван жил үргэлжилж, нийт 180 кредит цуглуулдаг. Энэ нь бусад орны их, дээд сургуулиудтай харьцуулахад харьцангуй өндөр кредитийн ачаалалтай гэсэн үг. Тиймээс нэг жилд 60 кредит цуглуулах шаардлагатай.
Харин дараагийн жилийн тэтгэлэгтээ үргэлжлүүлэн хамрагдахын тулд тухайн оюутан хамгийн багадаа 30 кредит цуглуулсан байх шаардлагатай. Мөн хэдий чинээ олон кредит цуглуулж, өндөр дүнтэй суралцана, төдий чинээ тэтгэлэгтэй холбоотой нэмэлт боломжууд нэмэгддэг. Жишээ нь өөрийн хүссэн дотуур байраа сонгох, илүү тохилог өрөөнд ганцаараа байрлах зэрэг давуу талтай.
Үүнээс гадна сайн суралцаж байгаа оюутнуудад сургуулиас нэмэлт тэтгэмж олгодог. Энэ нь үндсэн тэтгэлэг дээр нэмэгдэж, оюутны голч дүнгээс хамааран нэг улиралд хэдэн зуун еврогийн дэмжлэг авах боломжтой байдаг.
-Итали улсад суралцахын давуу болон сул тал юу вэ? Юу нь хамгийн их таалагддаг вэ?
-Италид анх очиход надад нэлээд хэцүү байсан. Монгол оюутан цөөхөн, бараг ганцаараа очсон учраас хэл мэдэхгүй шинэ орчинд дасан зохицох шаардлагатай болсон. Итали хүмүүс англи хэл мэддэг ч итали хэлээр ярихыг илүүд үздэг нь эхэндээ хүндрэлтэй санагдсан.
Мөн бичиг баримтын асуудал бүр маш удаан байдаг. Хүнд суртал гэдэг юм бол аль улсад ч байгаа. Гэхдээ ер нь Италид бол нэлээн удаан санагдаж байгаа. Энэ нь хүмүүсийн амьдралын хэв маягтай холбоотой бөгөөд ажил, хувийн амьдралын тэнцвэрийг чухалчилдагтай холбоотой гэж боддог.
Аюулгүй байдлын хувьд хувь хүнээс шалтгаална. Ялгаварлан гадуурхалт, хулгай дээрэмтэй холбоотой асуудал байдаг ч өдөр тутамд тулгараад байх зүйл биш. Орой, шөнө хотын захын гудамжаар явахдаа болгоомжтой байх хэрэгтэй. Мөн зуны улиралд нэлээд халдаг учраас би ихэвчлэн тэр үед Монголдоо ирдэг.
Харин Италийн амьдралын хэв маяг надад маш их таалагддаг. Хүмүүс ажилдаа хэт баригддаггүй, ажилчдаа бодож ажлын болон хувийн амьдралын тэнцвэрийг чухалчилдаг. Жишээл нь ресторанууд өдрийн цайны цагаар хоёр орчим цаг хааж, ажилчид нь гэртээ харьж хоолоо идээд буцаж ирэх нь түгээмэл. Мөн хүмүүс цаг барихдаа харьцангуй тайван. Анх байр түрээслэхдээ автобуснаас болж 10-15 минут хоцрох гэж санаа зовж байхад байрны эзэн маань “Зүгээр ээ, би кофе уугаад хүлээж байя, яаралгүй ир ээ” гэж хэлж байсан. Энэ тайван хандлага нь эхэндээ сонин санагдсан ч одоо надад их таалагддаг.
Итали хүмүүсийн чанга, эрчтэй ярих хэв маяг ч анхандаа чихэнд чийртэй санагддаг байсан ч одоо харин ч дуртай уянгалаг сонсогддог болсон. Мөн Европын холбооны орнууд руу визгүй, хямд өртөгөөр зорчих боломж бий.
Мөн гадаадад суралцах хугацаанд хувь хүний хувьд маш их хөгждөг. Илүү нээлттэй, бие даасан, эрсдэл авахаас айхаа больдог. Дээрээс нь Италийн тайван амьдралын хэв маяг нь хэт их ажлын цаг, дарамтүй байгаа нь амьдралын чанарт эерэгээр нөлөөлдөг гэж боддог.
-Италид суралцаж байхдаа хичээлээс гадуурх ямар боломжууд байдаг вэ?
-Дадлага хийх боломж их. Италид дадлага хийхэд заавал итали хэлтэй байх шаардлагатай гэж боддог оюутнууд байдаг ч англи хэл дээр дадлага хийж байгаа олон оюутан бий.
Мөн Шенгений орнуудаар визгүй зорчих боломжтой нь том давуу тал. Европын орнууд руу харьцангуй бага зардлаар аялах боломжтой.
Сургуулиудад олон төрлийн клуб байдгаас өөрийн сонирхсон клубт нэгдэхээс гадна өөрөө санаачлан клуб, үйл ажиллагаа зохион байгуулах боломжтой. Сургуулиас гадуур ч оюутнуудын оролцож болох олон үйл ажиллагаа зохион байгуулагддаг.
Италид сурахынхаа хажуугаар цагийн ажил хийх боломж хэр байдаг вэ?
Оюутнууд хуулийн дагуу долоо хоногт 20 хүртэлх цагийн ажил хийх боломжтой. Манай ихэнх найзууд кофе шоп, ресторан зэрэг газарт цагийн ажил хийдэг.
Мөн хүүхэд харах ажил нь оюутнуудад тохиромжтой боломжуудын нэг. Au Pair хөтөлбөр буюу айлд амьдарч, хүүхэд асрахын зэрэгцээ хэлээ сайжруулж, гарын мөнгө авах боломжтой. Энэ нь зөвхөн Германд байдаг хөтөлбөр биш. Европын олон оронд хэрэгждэг ба Италид ч мөн боломжтой. Бас заавал айлд амьдрах шаардлагагүйгээр хүүхэд харах, эсвэл долоо хоногт хэдэн цаг айлын хүүхдэд англи хэл заах зэрэг ажлыг хийж, өдөр тутмын жижиг зардлаа нөхөх боломжууд бий.
-Хэлний бэрхшээл хэр гарч ирдэг вэ? Их сургуульд итали хэл заадаг уу?
-Манай сургууль итали хэлний сургалтыг төгсөх хүртэл үнэ төлбөргүй санал болгодог. Би одоогоор B1 түвшин хүртэл сурсан байгаа. цаашаагаа үргэлжлүүлэн судалж болно.
Өөр нэг хэл сурчихсан байхад дараагийн шинэ хэл сурахад ер нь гайгүй шүү дээ. Итали хэлний дуудлага монгол хэлтэй харьцангуй төстэй талтай учраас монгол оюутнууд харьцангуй хурдан сурчихдаг. Дүрмийн хувьд бага зэрэг хүндрэлтэй ч өдөр тутам хүмүүстэй харилцаж, хэрэглэснээр аяндаа гайгүй.
-Одоо арван жилдээ сурч байгаа сурагч Италид суралцаж, тэтгэлэг авахыг хүсэж байгаа ч хаанаас эхлэхээ мэдэхгүй бол хамгийн чухал ямар 3 зөвлөгөө юу өгөх вэ?
-Нэгдүгээрт, өөрийгөө эртнээс таньж эхлээрэй. Ямар орчинд амьдрахад өөрт тань таатай байдаг, ямар сургууль, ямар мэргэжил сонгохоо сайтар бодож, өөрийгөө ойлгох хэрэгтэй.
Хоёрдугаарт, том зорилгоо жижиг алхмуудад хуваагаарай. Зөвхөн хэлний оноогоо авах зэрэг нэг жижиг зорилгод төвлөрөхөөс илүү эцсийн зорилгодоо хүрэхийн тулд ямар алхмууд хийхээ урьдчилан төлөвлөөрэй.
Гуравдугаарт, сайн судалж, мэдээлэлд шүүмжлэлтэй хандаарай. юманд шүүмжлэлтэй хандаж мэдээллийг шүүн тунгааж боддог сэтгэлгээнд суралцаарай л гэж хэлмээр байна. Тэгээд Италид сурах гоё шүү.
-Ярилцлага өгсөнд баярлалаа.
508
