Монголын авто спортын АНХНЫ ТОЙРОГ ЗАМ ашиглалтанд орлоо

Монгол улсын анхны авто спортын тойрог зам буюу Mongol63 Circuit энэ оны есдүгээр сарын 8-нд Налайх дүүрэгт нээлтээ хийж, үйл ажиллагаа явуулж эхэллээ.

Хүсэл сонирхлоороо нэгдсэн залуус 2007 оноос дрифт гэх авто спортын төрлийг Монгол улсад түгээн дэлгэрүүлж, хөгжүүлэх зорилго тавьжээ. Энэ хугацаанд зориулалтын бус зам талбайд бэлтгэл, сургуулилт, тэмцээн, уралдаанаа зохион байгуулж байсан тэд 2018 оны хавраас эхлэн Япон улсын алдарт замаас санаа авч, харайлттай замыг бүтээн байгуулах ажилдаа орж 2018 оны есдүгээр сард бүтээн байгуулалтын ажлаа бүрэн дуусгасан юм.

Mongol63 Circuit нь нийт зургаан га газрыг хамарсан дрифтийн цогцолборт талбай юм.

Уг талбай нь:

• 830 метр урт, 10-16 метр өргөн асфальтан тойрог зам
• 1610  хүний багтаамж бүхий сүүдрэвчтэй шаталсан зориулалтын сандал
• 100 гаран автомашины багтаамжтай тамирчдын зогсоол
• 300 метр квадрат бүх төрлийн агрегат болон кузов засварын гараж
• Түргэн хоолны буфет
• Амрах хэсэг сүүдрэвчүүд
• Хүүхдийн тоглоомын талбай
• 1000 гаруй автомашины үзэгчдийн зогсоол
• Тусгаарлах блокон хашаа, хамгаалалтын бетонон хана, торон хаалт бүхий бүтээн байгуулалттай.

Монголын анхны уралдааны тойрог замын нээлтийн ажиллагаанд зориулсан тэмцээний тэргүүн байранд "Obo Custums" клубын тамирчин О.Ууганбаяр, дэд байранд "JZX Mongolia" клубын тамирчин Н.Чингүн, гутгаар байранд "IDrift" клубын тамирчин Ж.Золжаргал нар тус тус шалгарчээ.

Уг зам нь “Дэлхийн стандартад нийцсэн, тамирчны ур чадвар, авьяас ихээхэн шаардсан сайхан зам болсон байна” хэмээн тамирчид ам сайтай байсан юм.

Дараагийн ээлжит дрифтын тэмцээн 2018 оны есдүгээр сарын 22-ны өдөр Налайх дүүрэг дэх тавдугаар хороо, Цонжин болдог явах замд, “Mongol63 Circuit”цогцолборт болох юм байна.