Хиймэл оюун ухаан (AI)-аар бүтээсэн зургийн уралдаанд жинхэнэ гэрэл зураг илгээсэн гэрэл зурагчин шүүгчдийг төдийгүй олон нийтийг гайхшруулж, хоёр шагнал хүртсэн ч зургийнхаа үнэн түүхийг дэлгэсний дараа тэмцээнээс хасагджээ.
Энэхүү сонирхолтой явдал 2024 оны зургадугаар сард болсон бөгөөд гэрэл зурагчин Майлс Астрей (Miles Astray) өөрийн авсан фламинго шувууны зургийг 1839 Awards-ийн хиймэл оюунаар бүтээсэн зургийн төрөлд илгээсэн байна.
ХАМГИЙН СОНИРХОЛТОЙ НЬ УГ ЗУРАГ ОГТ AI БИШ БАЙВ.
2022 онд Карибын тэнгисийн Аруба аралд аялж байхдаа энгийн камераар дарсан уг зургийг тэрээр “FLAMINGONE” хэмээн нэрлэжээ. Зурагт фламинго шувуу толгойгоо биеийнхээ доогуур оруулан, хошуугаараа гэдсээ маажиж байгаа нь харагдана. Гэрэл зургийг авсан өнцгөөс шалтгаалан шувуу толгойгүй мэт харагдаж, нэг хөл дээрээ тогтож буй ягаан өдөн бөмбөлөг шиг дүрслэгджээ.
Энэхүү ер бусын зураг хиймэл оюунаар бүтээсэн бүтээлүүдээс ч илүү бодит бус мэт санагдсан тул шүүгчдийн анхаарлыг татаж, хиймэл оюуны төрөлд гуравдугаар байр болон олон нийтийн санал хураалтын шагналыг зэрэг хүртсэн байна.
Тус уралдааны шүүгчдийн бүрэлдэхүүнд The New York Times, Christie’s, Centre Pompidou зэрэг нэр хүндтэй байгууллагын төлөөлөгчид багтаж байсан нь энэ явдлыг улам сонирхолтой болгожээ.
Гэвч шагнал хүртсэн тухайгаа мэдсэнийхээ дараа буюу 2024 оны зургадугаар сарын 11-нд Астрей зохион байгуулагчдад хандаж, уг зураг хиймэл оюунаар бүтээгдээгүй, өөрийнх нь авсан жинхэнэ гэрэл зураг болохыг илчилсэн байна. Үүний дараа маргааш нь түүний шагналыг хүчингүй болгож, тэмцээнээс хасжээ.
Зохион байгуулагчдын зүгээс түүний гаргасан санааг ойлгож, дэмжиж байгаагаа илэрхийлсэн ч бусад оролцогчдын хөдөлмөр, уралдааны шударга байдлыг харгалзан ийм шийдвэр гаргаснаа тайлбарласан юм. Харин гэрэл зурагчин өөрөө ч дүрмийн дагуу хасагдсан шийдвэрийг зөв гэж хүлээн зөвшөөрчээ.
ТЭРБЭЭР ЭНЭ ТУРШИЛТААРАА ЯМАР САНАА ИЛЭРХИЙЛЭХИЙГ ХҮССЭН БЭ?
Астрей өмнө нь хиймэл оюунаар бүтээсэн зургууд жинхэнэ гэрэл зургийн уралдаанд түрүүлж байсан тохиолдлуудаас санаа авч, энэ удаа эсрэгээр нь туршиж үзэхээр шийджээ.
Тэрбээр энэхүү үйлдлээрээ байгаль эх болон хүний бүтээлч сэтгэлгээ технологийн хөгжлийн эрин үед ч үнэ цэнээ алдаагүйг харуулахыг зорьсон байна.
Түүний хэлснээр, “Байгаль эх болон түүнийг дүрслэн харуулдаг хүмүүс машинтай өрсөлдөх чадвартай хэвээр байна. Бүтээлч байдал, сэтгэл хөдлөл гэдэг хэдхэн тоон тэмдэгтийн нийлбэр биш” хэмээн онцолжээ.
Энэ явдал хиймэл оюун ухаанаар бүтээсэн зураг болон бодит гэрэл зургийг ялгах улам бүр хэцүү болж буй өнөө үед уран бүтээлчдийн бүтээлч байдал, хүний оролцоо ямар үнэ цэнтэй болох тухай дахин нэг сонирхолтой хэлэлцүүлгийг өрнүүлсэн юм.
Эх сурвалж: CNN, CBS News, Smithsonian Magazine, 1839 Awards.
1907
