Жил бүрийн аравдугаар сарын 31-нд тэмдэглэдэг Halloween баяраар дэлхийн алдартнууд өвөрмөц хувцаслалт, нүүр будалт, бүтээлч дүр хувиргалтаараа олны анхаарлыг татдаг уламжлалтай. Энэ жилийн баяраар ч Холливудын одод болон дэлхийн хэмжээний уран бүтээлчид алдартай киноны баатрууд, поп соёлын бэлгэ тэмдэг болсон дүрүүд болон үлгэрийн амьтдын дүрд хувирчээ.
Ингээд 2026 оны Halloween-ий онцлох хувиралтуудаас хүргэе.
ЖАСТИН, ХЕЙЛИ БИБЕР НАР САХИУСАН ТЭНГЭР, ЧӨТГӨРИЙН ДҮРД ХУВИРЧЭЭ
Дуучин Жастин Бибер болон түүний эхнэр, загвар өмсөгч Хейли Бибер нар энэ жилийн Halloween-ээр хосын дүр сонгосон байна. Хейли цагаан өдтэй далавч, гэрэлт цагирагтай сахиусан тэнгэрийн дүрд хувирсан бол Жастин улаан өнгийн хувцас, чөтгөрийн эвэртэй малгайгаар дүрээ бүтээжээ.
Тэдний эсрэг тэсрэг өнгө төрхтэй хувцаслалт нь Halloween-ий сонгодог сахиусан тэнгэр, чөтгөрийн дүрийг орчин үеийн загвартай хослуулснаараа онцлог байв. Мөн Хейли хүү Жек Блюзийнхээ сүнсний дүртэй зургийг хуваалцсан нь гэр бүлийнх нь баярын уур амьсгалыг харуулжээ.
BLACKPINK-ИЙН ЖЕННИ “2 FAST 2 FURIOUS” КИНОНЫ СҮКИГИЙН ДҮРД
BLACKPINK хамтлагийн гишүүн Женни 2003 онд нээлтээ хийсэн “2 Fast 2 Furious” киноны Сүкигийн дүрийг сонгожээ. Тус дүрд жүжигчин Девон Аоки тоглосон бөгөөд өнгөлөг, содон хувцаслалт нь киноны хамгийн танигдсан төрхүүдийн нэг юм.
Женни нил ягаан богино цамц, тод ягаан өнгийн хувцас, урт шулуун үсээрээ дүрийг нь сэргээн харуулжээ. Тэрээр уг хувцаслалтаараа 2000-аад оны эхэн үеийн Y2K загварын хэв маягийг ч эргэн сануулсан байна.
Дуучин энэ төрхөөрөө загвар өмсөгч Кендалл Женнерийн Halloween болон төрсөн өдрийн үдэшлэгт оролцсон бөгөөд түүний хувирал BLACKPINK-ийн шүтэн бишрэгчдийн анхаарлыг татжээ.
BLACKPINK-ИЙН ЛИСА ЛУСЫН ДАГИНА БОЛЖЭЭ
BLACKPINK хамтлагийн өөр нэг гишүүн Лиса энэ жилийн Halloween-ээр нууцлаг, бараан төрхтэй лусын дагины дүр бүтээжээ. Тэрээр хайрс мэт хээтэй хувцас, өнгөлөг титэм, цэнхэр өнгийн нүдний линз, хурц хумс болон тод нүүр будалтаар дүрээ бүрдүүлсэн байна. Үлгэрийн ертөнцийн лусын дагиныг аймшигтай, нууцлаг хэв маягтай хослуулсан нь түүний хувцаслалтыг онцгой болгожээ.
Лиса Halloween-ий баяраар өвөрмөц нүүр будалт, нарийн хийцтэй хувцаслалтаараа олны анхаарлыг татдаг уран бүтээлчдийн нэг бөгөөд энэ жил ч өөрийн содон сонголтоо харуулсан байна. Мөн Лиса энэ жил зөвхөн өөрөө дүр хувиргаад зогсохгүй, хайртай тэжээвэр нохдуудаа ч баярт зориулан хувцаслажээ.
ДУУЧИН ТАЙЛА ТУУЛАЙН ДҮРЭЭР HALLOWEEN-ЭЭ ТЭМДЭГЛЭВ
Өмнөд Африкийн дуучин Тайла энэ жилийн Halloween-ээр цагаан өнгийн туулайн дүр төрхийг өөрийн загварын хэв маягтай хослуулжээ.
Тэрээр цагаан нэхсэн торон туулайн чихтэй гоёл, хөвсгөр цагаан хувцас, мөр хэсгийн өд мэт чимэглэлээр төрхөө бүрдүүлсэн байна. Харин өтгөн, буржгар үс нь цагаан хувцастай нь тод ялгарч байв.
Тайла өөрийн Instagram хуудсандаа “I wanna b Tyla for Halloween” буюу “Halloween-ээр Тайла өөрөө болмоор байна” гэсэн утгатай тайлбар бичиж, #APOPTOUR хаштаг ашиглажээ. Түүний бүжигчид муурын дүрээр хувирсан нь тоглолтын үеийн баярын уур амьсгалыг улам сонирхолтой болгосон байна.
KATSEYE ХАМТЛАГИЙНХАН DC COMICS-ИЙН ДҮРҮҮДЭД ХУВИРЧЭЭ
Охидын KATSEYE хамтлагийн гишүүд Halloween-ийг тохиолдуулан DC Comics ертөнцийн алдарт эмэгтэй дүрүүдийн хувцсыг сонгожээ. Тэд Монреаль хотод болсон “The WILDWORLD Tour” аялан тоглолтынхоо үеэр дүр хувиргалтаа танилцуулсан байна.
Тодруулбал, Юнчэ Харли Куинн, Даниэла Вондер Вүмэн, Лара Кэтвүмэн, харин Меган Poison Ivy-гийн дүрд хувирчээ. Дөрвөн өөр дүрийн өнгө төрх, хувцаслалт, нүүр будалтыг нарийн гаргасан нь шүтэн бишрэгчдийн анхаарлыг татсан байна.
ХАЙДИ КЛУМ АВАРГА ГАРНЫ ДҮРД ХУВИРЛАА
Halloween-ий хамгийн этгээд хувцаслалтаараа алдартай загвар өмсөгч Хайди Клум энэ жил ч өвөрмөц сонголтоороо олныг гайхшруулжээ. Тэрээр цус болсон мэт харагдах тасарсан хүний гарын дүр бүтээж, хумсны будаг, бөгж зэрэг жижиг нарийн ширийн зүйлийг хүртэл бодитоор урласан байна.
Клум олон жилийн турш Halloween-ий баяраар танигдахын аргагүй дүр хувиргалт хийдгээрээ алдартай бөгөөд энэ удаагийн хувцаслалт нь түүний хамгийн этгээд бүтээлүүдийн нэг болжээ.
КИМ КАРДАШИАН ОХИН НОРТ УЭСТИЙНХЭЭ ДҮРД
Реалити шоуны од Ким Кардашиан энэ жилийн Halloween-ээр охин Норт Уэстийнхээ содон төрхөөс санаа авчээ. Тэрээр охиныхоо өвөрмөц хувцаслалт, үс засалт, стильд тулгуурлан дүрээ бүтээсэн байна.
Алдартнуудын хүүхдүүд ч Halloween-ий хувцаслалтаараа олны анхаарлыг татдаг болсон энэ үед Кимийн сонголт гэр бүлийн хүрээнд ч баярыг хэрхэн хөгжилтэй тэмдэглэж болохыг харуулжээ.
ПАРИС ХИЛТОН БРИТНИ СПИРСИЙН ДҮРИЙГ СЭРГЭЭВ
Бизнес эрхлэгч, медиа од Парис Хилтон поп хөгжмийн од Бритни Спирсийн алдартай төрхийг дуурайн хувцасласан байна. Тэрээр дуучны тайзны дүр төрхөөс санаа авч, поп хөгжмийн дурсамжтай үеийг эргэн сануулжээ.
Хөгжмийн ертөнцийн алдартнуудын дүрд хувирах нь Halloween-ий түгээмэл сонголтуудын нэг бөгөөд Парисын хувиралт энэ чиг хандлагын жишээ болжээ.
БАРБАРА ПАЛВИН, ДИЛАН СПРОУС НАР “THE NIGHTMARE BEFORE CHRISTMAS”-ИЙН ДҮРҮҮДЭД
Загвар өмсөгч Барбара Палвин болон жүжигчин Дилан Спроус нар энэ жилийн Halloween-ээр “The Nightmare Before Christmas” хүүхэлдэйн киноны алдарт дүрүүдийг сонгожээ. Барбара Палвин киноны гол дүр Жэк Скеллингтоны дүрд хувирсан бол түүний нөхөр Дилан Спроус Оги Буги (Oogie Boogie)-гийн дүрийг бүтээсэн байна.
МИЛЛИ БОББИ БРАУН “THE INCREDIBLES” КИНОНЫ ДҮРД ХУВИРЧЭЭ
“Stranger Things” цувралын од жүжигчин Милли Бобби Браун энэ жилийн Halloween-ээр “The Incredibles” хүүхэлдэйн киноны дүрд хувирснаа Instagram сторидоо харуулжээ. Тэрээр тус киноны супер баатрын гэр бүлийн дүр төрхөөс санаа авч, баярын уур амьсгалд тохирсон хувцаслалт сонгосон байна.
2026 оны Halloween-ий хувцаслалтуудаас харахад алдартнуудын дунд киноны дүрийг сэргээн харуулах, бусад уран бүтээлчдээс санаа авах, үлгэрийн болон фантастик дүрүүдийг өөрийн хэв маягтай хослуулах хандлага ажиглагдаж байна.
Halloween нь зөвхөн аймшигтай хувцас өмсөх баяр биш бөгөөд алдартнуудад өөрсдийн бүтээлч байдал, загварын мэдрэмж, хошин зан чанараа харуулах боломж олгодог онцгой өдөр хэвээр байна.
Эх сурвалж: Vogue - Halloween Costumes of 2026
1057
