Энэ удаа ярилцлагын буландаа дөрөвдүгээр сарын 5-нд нээлтээ хийсэн “Би Нар” гэр бүлийн уран сайхны киноны 3-р хэсгийн гол дүрийн жүжигчин Ж.Ирмүүнтэй ярилцлаа.

YOLO: Сайн уу?  Өөрийгөө танилцуулаач.

-Намайг Жавхлангийн Ирмүүн гэдэг. 14 настай.  Баянгол дүүргийн Эхлэл бүрэн дунд сургуулийн 8-р ангид сурдаг.

YOLO: Ж.Сэнгэдорж найруулагчийн “Би Нар” киноны гол дүрд тоглосон. Энэ киноныхоо талаар ярина уу.

-Манай кино хүүхэд, гэр бүл, залуучуудын тусламжтайгаар бүтээгдсэн гэр бүлийн кино. Киноны тухайд гэр бүлийн гишүүдэд маш их зүйлийг ойлгуулахыг зорьж хийгдсэн. Орчин үед цахим ертөнц бий болж амьд харилцаа үгүй болсоор байгаа. Үүнийг шүүмж хэлбэрээр харуулсан бүтээл юм.

YOLO: Энэ чиний анхны уран бүтээл үү? Өмнө нь ямар нэгэн дүр дээр ажиллаж байв уу?

-Бүрэн хэмжээний дэлгэцийн уран бүтээлийн гол дүрийн хувьд анхных. Өмнө нь Улсын драмын эрдмийн театрын “Би эндээс явахгүй” жүжгийн Батаа гэдэг хүүгийн дүрийг бүтээж байсан.

YOLO: Кинонд тоглоход хүндрэлтэй үе байсан уу?

-Байсан шүү. Миний зураг авалтын хэсгүүд маш хүйтэнд авагдсан. Бас анх удаа кинонд тоглосон болохоор мэдэхгүй зүйл их байсан ч миний хамтрагч Ц.Мичидмаа үргэлж зааж зөвлөж байсан.

YOLO: Оролцон тоглосон бусад гол дүрийн жүжигчдээ танилцуулбал?

-Манай кино нийт 3 хэсгээс бүрдсэн. 1-р хэсгийн гол дүрд Cocktail Films-ийн А.Өнөржаргал /Өөскө/ ахын хүү Ө.Итгэлт, 2-р хэсэгт Л.Шинэзул, 3-р хэсэгт Ж.Ирмүүн миний бие нар тоглосон /инээв/.

YOLO: Цаашдаа кинонд тоглох уу?

-Боломж олдвол тоглоноо. Би жүжигчин болно. Тиймээс энэ кино надад маш олон үүд хаалгыг нээж өгсөн.

YOLO: Яагаад урлагийг сонгох болсон бэ?

-Манай элэнц өвөө жүжигчин Л.Лувсан гэдэг хүн байсан. Би энэ мэргэжлийг өвлөж байгаадаа баяртай байгаа. Бас урлаг их сонирхолтой шүү. /инээв/

YOLO: Чөлөөт цагаараа юу хийдэг вэ?

- Найзуудтайгаа байж хөгжилддөг, бас жүжиглэх урлагийн тухай номууд уншдаг.

YOLO: Мөрөөдлөөсөө хуваалцаач?

-Монголд гэлтгүй дэлхийд үнэлэгдсэн чадвартай жүжигчин болоод, сурч мэдсэнээ хүүхдүүдэд зааж багшлахыг хүсдэг.

YOLO: Хүндэлдэг хүн чинь хэн бэ?

-МУГЖ Ж.Оюундарь эгчийг хүндэлдэг. Бүх дүрийг бодитоор амилуулж хүнд хүргэж чаддаг мундаг хүн шүү.

YOLO: Бирд гурван хүслийг чинь биелүүлж өгье гэвэл юу гэж хүсэх вэ?

-Монголын бүх хүнийг боловсон, соёлтой, боловсролтой болгохыг, хүн бүхэн ижил тэгш эд баялагтай болохыг, Монгол улсыг дэлхий мэддэг, гадаад хүмүүс Монголд ирэхийг хүсдэг байгаасай гэж хүснэ.

YOLO: Хамгийн их талархдаг хүндээ хандаж үг хэлээч?

-Мэдээж ээж аав болон эргэн тойрныхоо хүмүүст баярлалаа. Харин хамгийн ихээр эмээдээ талархдаг. Эмээ минь намайг анх урлаг руу хөл тавиулж Хүүхдийн ордны Драмын дугуйланг зааж өгсөн. Тиймээс миний гаргасан амжилт бүхэн таных шүү, эмээ. Баярлалаа.

YOLO: Ярилцсанд баярлалаа амжилт хүсье!

-Баярлалаа