ЗАХИДАЛ: Би түүнээс үерхэе гэж гуйсан нь дээр үү?

  Yolo.mn сайтын редакци нь ямар нэгэн асуудал тулгарсан уншигч хүүхдүүдээс захиа хүлээн авч мэргэжлийн сэтгэл судлаач болон эмчийн хариу зөвлөгөөг уламжлан хүргэдэг. Ээлжит захиа болон зөвлөгөөг хүргэж байна.

АСУУДАЛ:  Гол нь би түүнээс үерхэхийг гуйсан нь дээр эсэхийг мэдэхгүй байна

Намайг Н гэдэг. Би 14 настай. Би нэг дотны эмэгтэй найздаа сайн болоод өөрт нь хэллээ. "Би чамд сайн болчихож. Гэхдээ би чамаас үерхэе гэж гуйж чадахгүй нь. Яаж ч бодсон хоёулаа сайн найзууд хэвээрээ байсан нь дээр байх" гэж хэлсэн юм.  Тэгсэн чинь манай найз "Би итгэж чадахгүй байна", "Чи намайг мартаж чадах уу?" гэж асуусан. Би "Чадна аа, гэхдээ хоёулаа сайн найзууд хэвээрээ байна шүү" гэж хэлсэн юм. Тэгээд гол нь би түүнээс үерхэе гэж гуйсан нь дээр үү, эсвэл больсон нь дээр үү? Та бүхнээс туслалцаа хүсэж байна. 

ЗӨВЛӨГӨӨ: Илүү сайхан нөхөрлөл байж болох харилцааг үерхэл болгох гэж байж ч мэднэ

Сайн уу? Энэ өдрийн мэнд хүргэе. Өсвөр насанд шинээр мэдэрдэг олон гайхалтай, бас сонирхолтой мэдрэмжүүдийн нэг нь бусдад дурлах, татагдах явдал юм. Эхлээд найздаа өөрийнхөө сэтгэлийг илчилсэнд нь баяр хүргэе. Хэн нэгэнд өөрийнхөө сэтгэл мэдрэмжийг хуваалцана гэдэг их зориг шаардсан, бас их сайн зүйл юм шүү. Найздаа сайн болоод хамт баймаар санагдсан тэр мэдрэмжүүд яг хэзээнээс төрж эхэлсэн,  та хоёр хамт байхдаа хөгжилтэй ямар зүйл хийдэг талаар эргэцүүлэн нэг бодоод үзээрэй. Магадгүй илүү сайхан нөхөрлөл байж болох харилцааг үерхэл болгох гэж байж ч мэднэ. Мөн нэг нэгэндээ дурласан ч гэсэн заавал үерхэх ёстой гэсэн зүйл байхгүй. Илүү сайхан нөхөрлөж найзалмаар байгаагаа найздаа ойлгуулаад ярилцаад үзээрэй. Амжилт хүсье.

Сэтгэл Судлалын Үндэсний Төв
Туслах сэтгэл судлаач
Т. Цэцэгбаяр

Хэрэв чамд хэн нэгэнтэй ярилцаж чадахгүй, ганцаараа шийдвэрлэхэд бэрхшээлтэй асуудал байгаа бол yolo@mongolcontent.mn хаяг руу кириллээр, дэлгэрэнгүй, гаргацтай бичиж   цахим шуудан ирүүлснээр бид мэргэжлийн сэтгэл судлаач болон эмчийн зөвлөгөөг хүргэж чамд тус болоход хэзээд бэлэн байх болно. Мөн асуудал бүхий захиан дээрээ өөрийн НАС, ХҮЙСийг тодорхой дурдаарай. Жич: Бид мэдээллийг чандлан хадгалах бөгөөд хариуг сайтад нийтлүүлэхийг хүсэхгүй тохиолдолд захидалдаа дурдана уу. Бид хариу зөвлөгөөг 7-10 хоногийн дараа хүргэх болно.