Үзэгчдийн хүлээлтийг үүсгэж буй энэ сард цацагдах К-драмууд

Арванхоёрдугаар сар бол сэтгэл догдлуулсан мөчүүдээр дүүрэн онцгой сар. Шинэ жилийн баярын гэрэл чимэглэлүүд хотыг чимж хүйтэн жавартай өдрүүдэд дулаан мэдрэмж төрүүлнэ. Гудамжинд баярын дуу эгшиглэж, дэлгүүрүүдийн шилэн цонх өнгөөр алаглан, хүмүүсийн сэтгэлд баярын хүлээлт мэдрэгдэнэ.

Өнөөдрийн нийтлэлээр бид к-драма сонирхогчдодоо зориулан энэ сард нээлтээ хийх 9 киног танилцуулж байна. Баяраас өмнө амжиж шинэ к-драмуудаа хүлээн авч үзээрэй.

“Cinderella Game”

Цацагдах өдөр: Арванхоёрдугаар сарын 2

Ку Ха На бол ганц бие эмэгтэй. Тэрээр гэр бүлийнхээ ууган охин бөгөөд дүү нараа сайн халамжилж өсгөсөн, хариуцлагатай нэгэн. Гэтэл тэрээр аав ээжийнхээ жинхэнэ охин биш гэдгийг мэддэг. Эцэг эх нь түүний жинхэнэ гэр бүлийн дайсан байсан бөгөөд анхнаасаа л охиныг ашиглаж байжээ. Тэрээр хуурамч эцэг эхээс өшөө авахаар шийдэн тэмцэж буйгаар үйл явдал өрнөнө.

“The Road in Between”

Цацагдах өдөр: Арванхоёрдугаар сарын 3

Тус кино нь KBS-ийн жил бүр гаргадаг богино хэмжээний киноны нэг бөгөөд замын зураг авалтын багт ажилладаг эмэгтэйн хайр дурлалын түүхийг өгүүлнэ.

“Light Shop”

Цацагдах өдөр: Арванхоёрдугаар сарын 4

Вон Ян гэх эрэгтэй жижигхэн гэрлийн дэлгүүр ажлуулдаг. Түүний дэлгүүр энгийн мэт харагдах ч бусдаас нэлээн онцгой. Учир нь Вон Яны дэлгүүр үхэл, амьдралын заагийг холбодог бөгөөд зөвхөн сүнснүүд түүгээр үйлчлүүлнэ.

“Sorry Not Sorry”

Цацагдах өдөр: Арванхоёрдугаар сарын 5

Жи Сон И бол сүй тавьсан мэт дүр эсгэгч ганц бие эмэгтэй. Тэрээр байрны зээлээ төлж чадахгүй байгаа тул янз бүрийн цагийн ажил хийж амьдралаа залгуулах гэж хамаг чадлаараа хичээнэ. Сон И шинэ хотод нүүж ирснээр түүнд олон адал явдалтай учирна.

“To My Lonely Sister”

Цацагдах өдөр: Арванхоёрдугаар сарын 10

KBS-ийн бас нэгэн богино хэмжээний кино бол “To my lonely sister” юм. Үйл явдалд ганцаардмал эгчтэй ахлах сургуулийн охин Ха Неул эгчдээ өрөөнөөсөө зугтахад нь туслах төлөвлөгөө боловсруулж буйгаар үйл явдал өрнөнө.

“Who Is She!”

Цацагдах өдөр: Арванхоёрдугаар сарын 18

О Мал Сун бол хүүхдүүдээ ганцаараа өсгөн, жижиг ресторан ажиллуулж буй 70 настай эмэгтэй. Нэгэн өдөр охин Жи Суктай муудалцан гэрээсээ гарав. Энэ үед түүнд ямар нэгэн зүйл тохиолдож, гадаад төрх нь 20 настай байсан үе рүүгээ буцна. Залуу төрхтэй болсон тэрээр өөртөө О Дү Ри гэх шинэ нэрийг өгч, дуучин болох мөрөөдлөө биелүүлэхээр шийднэ. Дуучин болохоор Unis Entertainment-д айдол болох дадлагажигчаар элсэж ахлах продюсер Даниел Хантай уулздаг.

Энэ хооронд түүний ач охин Чой Ха На ч бас дуучин болох мөрөөдлөө биелүүлэхээр Unis Entertainment-д дадлагажигчаар элссэн байна. 

“Check in Hanyang”

Цацагдах өдөр: Арванхоёрдугаар сарын 21

Ёнчонру бол Жусоны хамгийн том зочид буудал юм. Тэдний уриа бол үйлчлүүлэгч бол хаан юм. Ёнчонру буудал дөрвөн шинэ дадлагажигчтай болсон бөгөөд тэдэнд яагаад тэнд ажиллах шалтгаан бий.

Lee Eun бол үнэндээ Жусоны ханхүү хэдий ч өөрийгөө нууж өөр нэрээр энд ажиллана. Харин Хон Деок Су эмэгтэй хүн боловч эрэгтэй хүний дүрд хувиран ажиллана. Түүний зорилго бол буудлын ерөнхий менежер болох. Өөр нэг нь Чун Жун Хва буюу Ёнчонругийн залгамжлагч юм. Тэрээр үүнийг удирдах ямар ч сонирхол байхгүй ч аавынхаа хүчээр дадлагажна. Сүүлийн дадлагажигч бол Го Су Ра. Түүний гэр бүл хэсэг хугацаанд уналтад орж энд ажиллах зайлшгүй шаардлага тулгарна.

“Namib”

Цацагдах өдөр: Арванхоёрдугаар сарын 23

Кан Сү Хён бол дуучдыг бэлтгэдэг продюсер юм. Тэрээр үл мэдэгдэх шалтгаанаар Pandora Entertainment-аас халагдсан. Цалингаараа гэр бүлээ тэжээдэг байсан түүнд ажлаас халагдах шийдвэр хүндхэн тусна. Сү Хён дахин хөл дээрээ босохыг хичээн шинэ төсөл эхлүүлэх ба эхний дадлагажигчаар Ёо Жин Вүүг сонгодог.

Ёо Жин Вүү сүүлийн 10 жилийн турш дуучин болохоор бэлтгэгдсэн ч гэр бүлийн санхүүгийн байдал хүндхэн байна. Яг энэ үед Сү Хён түүнийг дадлагажигчаар сонгосон нь түүнд урам өгч тэд хамтдаа ажиллана.

“Squid Game 2”

Цацагдах өдөр: Арванхоёрдугаар сарын 26

Киноны эхний ангид Сон Ги Хүн ялагч болж төгсдөг бол энэ ангид түүнээс хойш гурван жилийн дараах үйл явдлыг харуулах юм. Сон Ги Хүн ялагч болсны дараа АНУ явахаа больж тоглоомд дахин орж, шинэ тоглогчдыг үхлийн аюулаас сэргийлэх, тоглоомын ард хэн байгааг мэдэхээр тэмцэж буйгаар үйл явдал өрнөнө.

Эх сурвалж: Soompi