Hello Kitty өнөөдөр 50 нас хүрлээ

Китти өнөөдөр 50 нас хүрч байгаа бөгөөд түүний дүрсээр музейн үзмэр дүүрч сэдэвчилсэн паркийн арга хэмжээ болон үндэсний хэмжээний аялан тоглолт Япон даяар зохион байгуулагдаж байна.

“Hello Kitty”-гийн 50 жилийн ой нь түүний түгэн дэлгэрсэн алдар суу хэрхэн үргэлжилсээр байгааг харуулж байна. Японы зугаа цэнгэлийн Санрио компани өнгөрсөн жил түүний нэр, дүрийг ТикТок дээр анимэйшн хуудас, Роблоксын тоглоомууд, Зепето сошиал платформд аватар нэвтрүүлж баярын үйл ажиллагааг эхлүүлсэн юм.

Ойн баярт зориулсан тусгай хувилбарын бараа бүтээгдэхүүнүүд нь гэрийн тэжээвэр амьтны хүзүүвч, гоо сайхны бүтээгдэхүүн, МакДональдсын “Happy Meal”-ээс эхлээд Crocs гутал, Baccarat болор дүрс хүртэлх олон төрлөөр гарсан.

“Hello Kitty”-гийн зурагтай “50” гэсэн тоог тэврэн харуулсан алтан зоосон зүүлтийг 120,000 иен (ойролцоогоор 800 ам.доллар)-оор худалдаалж байхад Casio бугуйн цаг 18,700 иен (120 ам.доллар)-ын үнэтэй байна.

Эхлэл түүх рүү нь орцгооё.

Мики Маус, Снүүпи нарын адил Hello Kitty нь хүүхэлдэйн дүрээр эхэлсэнгүй. Санрио компанийн залуу зураач Юко Шимизү 1974 онд энэхүү дүрийг бичгийн хэрэглэл, уут, аяга, жижигхэн дагалдах хэрэгслийг чимэглэх зорилгоор анх зохиосон. Тус зураг дараа жил нь мөнгөний хэтэвчин дээр гарсан даруйдаа Японд асар их амжилт олжээ.

Hello Kitty-гийн арилжааны амжилт Ази тивээс хүрээгээ тэлж бусад олон оронд хүрэхийн  хэрээр түүний хувийн хэмээх түүх нь ч бас түгэн дэлгэрэв. Санрио түүний нэрийг Kitty White, өндрийг нь таван алимны дайтай, төрсөн газрыг нь Лондон хотын зах хэмээн тодорхойлж, мөн эцэг эх болон ихэр эгчтэйгээ хамт амьдардаг гэж зарлажээ.

Kitty-гийн намтар нь төгөлдөр хуур тоглох, ном унших, нарийн боов хийх зэрэг хоббитой байхаар баяжигдсан.

Харин хэдэн жилийн өмнө 40 насных нь төрсөн өдрөөр Санрио нэгэн гайхалтай мэдээлэл хийсэн нь фенүүдийг цочроожээ. Тэрээр Kitty нь муур шиг хэдий ч түүнийг “хүн” хэмээн нотлохыг хичээсэн байна.

Канадын дуучин Аврил Лавинь арав гаруй жилийн өмнө “Hello Kitty” нэртэй дуу гаргаж, Британий хаан Чарльз энэ зун Японы эзэн хаан Нарүхито, хатан Масаког хүлээн авч уулзахдаа ойн мэндчилгээ дэвшүүлсэн нь түүний өргөжин тэлсэн цар хүрээг тодхон илтгэнэ.

Санрио компаниас хөөрхөн, эвлэгхэн бусад олон дүрсийг бүтээсэн боловч Hello Kitty шиг удаан хугацаанд алдаршсан нь үгүй юм.