BLACKPINK хамтлагийн гишүүн, соло уран бүтээлч JENNIE хөгжмийн салбар дахь амжилтаас гадна дэлхийн томоохон брэндүүдийн анхаарлыг татсан загвар, гоо сайхны нөлөө бүхий уран бүтээлч болжээ. Түүний хамтран ажилласан брэндүүдийг харахад зөвхөн тансаг зэрэглэлийн загвараар хязгаарлагдахгүй. Гоо сайхан, спорт хувцас, нүдний шил, технологи, автомашин, санхүү, аялал, өдөр тутмын арчилгаа зэрэг олон салбарыг хамарч байна.
Хамгийн сонирхолтой нь JENNIE зарим брэндийн хувьд зөвхөн сурталчилгааны нүүр царайгаар ажилладаггүй. Тэр өөрийн санаа, хэв маягийг бүтээгдэхүүний загвар, сурталчилгааны агуулга, цаашлаад бүхэл бүтэн төслийн үзэл санаанд шингээж ирсэн юм.
CHANEL - түүний хамгийн хүчтэй холбоотой брэнд
JENNIE-гийн нэртэй хамгийн хүчтэй холбогддог брэнд бол Францын алдарт загварын ордон CHANEL. Тэр 2017 оноос тус брэндтэй хамтран ажиллаж эхэлсэн бөгөөд өдгөө CHANEL-ийн дэлхийн элч төлөөлөгчдийн нэг юм. Олон жилийн турш үргэлжилсэн хамтын ажиллагааны үр дүнд JENNIE-г загварын ертөнцөд CHANEL-ээс салгаж харахад бэрх болсон бөгөөд түүнийг заримдаа "Human Chanel" буюу "CHANEL-ийн амьд хувилбар" хэмээн нэрлэх нь ч бий.
Gentle Monster - JENNIE-гийн санаа шингэсэн нүдний шил
JENNIE-гийн хамгийн онцгой хамтын ажиллагааны нэг бол Өмнөд Солонгосын нүдний шилний брэнд Gentle Monster-той хийсэн төсөл юм. 2020 онд тэд "Jentle Home" нэртэй анхны хамтарсан коллекцио гаргасан бөгөөд JENNIE бүтээгдэхүүний загвар, ерөнхий үзэл санаанд өөрөө оролцжээ. Түүний хүүхэд насны дурсамж, төсөөллийн ертөнцөөс санаа авсан уг төсөл нь энгийн нүдний шилний цуглуулгаас илүүтэй бүхэл бүтэн үлгэрийн ертөнц мэт бүтээгдсэнээрээ анхаарал татсан.
Үүний дараа 2022 онд "Jentle Garden", 2023 онд "Jentle Salon" төслүүд үргэлжилсэн нь JENNIE болон Gentle Monster-ийн хамтын ажиллагааг илүү өргөн хүрээнд хүргэсэн юм.
HERA - Солонгосын гоо сайхны брэндийн нүүр царай
JENNIE гоо сайхны салбарт ч хүчтэй байр суурь эзэлдэг. Тэр Өмнөд Солонгосын гоо сайхны брэнд HERA-ийн дэлхийн элч төлөөлөгчөөр ажиллаж, уруулын будаг, нүүр будалтын бусад бүтээгдэхүүний сурталчилгаанд оролцож байсан. Түүний оролцоо HERA-гийн орчин үеийн, залуу хэрэглэгчдэд чиглэсэн дүр төрхийг бэхжүүлэхэд чухал нөлөө үзүүлсэн.
Tamburins - үнэртэн, гоо сайхны шинэ дүр төрх
JENNIE-гийн нэр холбогддог өөр нэг Солонгосын брэнд бол Tamburins. Тус брэнд нь үнэртэн, гарын тос, биеийн арчилгааны бүтээгдэхүүнээрээ танигдсан бөгөөд JENNIE-гийн өвөрмөц, минималист хэв маягтай сайн зохицдог. Түүний оролцсон сурталчилгаанууд нь бүтээгдэхүүнийг энгийнээр танилцуулахаас илүүтэй урлагийн бүтээл мэт дүрслэгддэгээрээ онцлог.
Calvin Klein - өөрийн хэв маягаа бүтээгдэхүүнд шингээсэн нь
JENNIE-гийн загварын салбар дахь томоохон хамтын ажиллагааны нэг бол Calvin Klein. Тэр тус брэндийн олон сурталчилгаанд оролцохын зэрэгцээ 2023 онд өөрийн нэртэй тусгай цуглуулга гаргасан. Ингэснээр JENNIE зөвхөн брэндийн хувцсыг өмсөж сурталчлаад зогсохгүй өөрийн хувцаслалтын хэв маяг, үзэл санааг бүтээгдэхүүнд шингээсэн юм.
adidas - Хамтран бүтээсэн анхны цуглуулга
JENNIE-гийн хамгийн сүүлийн үеийн томоохон хамтын ажиллагааны нэг бол adidas. 2026 онд "adidas Originals by JENNIE" нэртэй анхны хамтарсан цуглуулгаа гаргасан бөгөөд энэ удаа тэр зөвхөн брэндийн элч төлөөлөгч биш, бүтээгдэхүүний загварт оролцсон хамтран дизайнерын үүрэг гүйцэтгэсэн.
Цуглуулгад JENNIE-гийн балетын хөдөлгөөнөөс санаа авсан эмэгтэйлэг хэв маягийг adidas-ийн сонгодог спорт хувцастай хослуулжээ.
Frankies Bikinis - Хамтран загварчилсан хувцасны цуглуулга
2026 онд JENNIE Frankies Bikinis-тэй хамтран усны хувцас болон өдөр тутмын хувцасны цуглуулга гаргасан. Энэ хамтын ажиллагаа мөн л түүний өөрийн хэв маягийг бүтээгдэхүүнд шууд тусгасан жишээ юм. Усны хувцас, даашинз, гадуур өмсөх хувцас, гэрийн хувцас зэрэг олон төрлийн бүтээгдэхүүн багтсан уг цуглуулгыг JENNIE өөрөө хамтран загварчилжээ.
Jacquemus - Загварын тайзнаа гарсан нь
JENNIE-гийн загварын салбар дахь нөлөөг харуулах бас нэг жишээ бол Францын Jacquemus брэнд. Тэр тус брэндийн сурталчилгаанд оролцож байсан бөгөөд 2024 онд Jacquemus-ийн 15 жилийн ойн загварын шоунд загвар өмсөгчөөр алхсан.
Ийнхүү JENNIE зөвхөн брэндийн сурталчилгаанд оролцдог уран бүтээлч бус, дэлхийн томоохон загварын шоунд өөрөө загвар өмсөгчөөр оролцох хэмжээнд хүрсэн юм.
Beats by Dre - хөгжимтэй нь хамгийн ойр хамтын ажиллагаа
JENNIE-гийн үндсэн салбар болох хөгжимтэй хамгийн шууд холбогддог брэндүүдийн нэг бол Beats by Dre. Тэр тус брэндийн сурталчилгаанд оролцохоос гадна JENNIE-ийн нэртэй тусгай хувилбарын чихэвч гаргаж байсан. Улаан өнгийн тусгай загвар нь түүний "Ruby" нэртэй уран бүтээлийн үеийн дүр төрхтэй уялдсан юм.
Ray-Ban - загвар ба технологийн хослол
2026 онд JENNIE Ray-Ban-ийн дэлхийн элч төлөөлөгч болсон нь түүний брэндийн хүрээг технологийн салбар руу дахин тэлсэн. Ялангуяа Ray-Ban Meta ухаалаг нүдний шилтэй холбогдсоноор JENNIE-гийн загварын нөлөө нүдний шил, өмсөж ашигладаг технологийн бүтээгдэхүүнтэй огтлолцож байна.
Porsche - өөрийн нэртэй автомашин
JENNIE-гийн хамтын ажиллагааны жагсаалтад автомашины салбар ч багтдаг. 2022 онд тэр Porsche-той хамтран өөрийн хүсэл сонирхолд тулгуурласан Taycan 4S Cross Turismo загварыг бүтээх үйл явцад оролцсон. Машинд "Jennie Ruby Jane" нэр өгсөн нь түүний нэрийг бүтээгдэхүүнтэй шууд холбосон онцгой жишээ болсон.
Visa - хөгжим, аялал, амьдралын хэв маяг
JENNIE мөн санхүүгийн салбарын томоохон компани Visa-тай хамтран ажилласан. Тус хамтын ажиллагаагаар аялал, тоглолт, уран бүтээлчийн амьдралын хэв маягийг Visa-ийн үйлчилгээнтэй холбож харуулсан бөгөөд JENNIE-гийн дэлхийн хэмжээний уран бүтээлч гэсэн дүр төрхийг ашигласан.
Vaseline - тансаг загвараас өдөр тутмын хэрэглээ хүртэл
Харин Vaseline-тэй хийсэн хамтын ажиллагаа нь JENNIE-гийн брэндийн хүрээ ямар өргөн болсныг харуулах өөр нэг жишээ юм. Тэр Vaseline-ийн биеийн арчилгааны бүтээгдэхүүний дэлхийн элч төлөөлөгчөөр ажилласнаар CHANEL, Jacquemus зэрэг тансаг зэрэглэлийн брэндүүдээс эхлээд хүмүүсийн өдөр тутам хэрэглэдэг арчилгааны бүтээгдэхүүн хүртэл түүний нэртэй холбогдох болсон.
JENNIE-гийн брэндийн хүрээ хэр өргөн бэ? Түүний нэр холбогдож байсан томоохон брэндүүдийг салбараар нь харвал:
CHANEL - тансаг зэрэглэлийн загвар
Gentle Monster - нүдний шил
HERA - гоо сайхан
Tamburins - үнэртэн, гоо сайхан
Calvin Klein - хувцас, амьдралын хэв маяг
adidas - спорт болон өдөр тутмын хувцас
Jacquemus - тансаг зэрэглэлийн загвар
Maison Kitsuné - загвар
Frankies Bikinis - усны хувцас, бэлэн хувцас
Beats by Dre - дуу хөгжмийн технологи
Ray-Ban - нүдний шил, ухаалаг технологи
Porsche - автомашин
Visa - санхүү, аялал
Vaseline - биеийн арчилгаа
Энэ жагсаалтыг харахад JENNIE нэг салбарын сурталчилгааны нүүр царай биш гэдэг нь тодорхой. Түүний зарим хамтын ажиллагаа энгийн сурталчилгаанаас аль хэдийн давж, өөрийн нэртэй бүтээгдэхүүн гаргах, бүтээгдэхүүний загварт оролцох, бүр бүхэл бүтэн төслийн үзэл санааг хамтран бүтээх түвшинд хүрчээ.
Gentle Monster-ийн "Jentle" төслүүд, adidas-ийн хамтарсан цуглуулга, Frankies Bikinis-ийн хувцасны цуглуулга, Porsche-ийн "Jennie Ruby Jane" загвар зэрэг нь үүний тод жишээ. Тиймээс JENNIE-гийн хамгийн том брэнд нь магадгүй өөрөө юм.
Хөгжим, загвар, гоо сайхан, спорт, технологи, автомашин, санхүү, өдөр тутмын хэрэглээ зэрэг хоорондоо тэс өөр салбарын брэндүүд түүний нэртэй холбогдож байгаа нь BLACKPINK-ийн гишүүний нөлөө хөгжмийн тайзаас аль хэдийн давж, дэлхийн хэмжээний соёл, хэрэглээний зах зээлд хүрснийг харуулж байна.
4518
